Situar ao grupo de investigación CF1 como un referente a nivel nacional (a curto-medio prazo) e internacional (a medio-longo prazo) especializado en temáticas relacionadas co sector agro-alimentario: Sostibilidade Ambiental, Calidade Alimentaria e Saúde.

Para iso plantexámonos os seguintes obxectivos estratéxicos que están estreitamente aliñados con varios dos obxectivos de desenvolvemento sostible (ODS) das Nacións Unidas:

• Obxectivo 1. Xerar un coñecemento especializado na protección do medioambiente, en materia de uso sostible dos produtos fitosanitarios e abonos orgánicos (esterco e xurros) mediante a aplicación de prácticas agrícolas que aseguren a sostibilidade da produción agraria e garantan a conservación dos recursos hídricos.
• Obxectivo 2. Xerar un coñecemento especializado na produción de alimentos seguros e de calidade diferenciada.
• Obxectivo 3. Xerar un coñecemento especializado na identificación de biomarcadores tanto de efectos positivos na saúde dos consumidores asociados á inxesta de alimentos funcionais (saúde e benestar) como de efectos negativos na saúde relacionados coa exposición a distintos contaminantes (saúde pública).
• Obxectivo 4. Comunicar e difundir o coñecemento xerado co fin de alcanzar unha ciencia máis aberta, transparente, inclusiva e colaborativa que contribúa a fomentar as vocación actitudes e aptitudes científicas e innovadoras entre as mulleres e reducir a brecha existente entre o ámbito científico e a sociedade.